უორენ ბაფეტმა ბილ გეიტსის ფონდის დაფინანსება შეწყვიტა

უორენ ბაფეტისა და ბილ გეიტსის მრავალწლიანი მეგობრობა და საქველმოქმედო პარტნიორობა დასრულდა. Berkshire Hathaway-ს 95 წლის ხელმძღვანელმა გადაწყვიტა, ყოველწლიური შემოწირულობა, რომელიც დაახლოებით 6 მილიარდი დოლარის ღირებულების აქციებს შეადგენს, გეიტსის ფონდის ნაცვლად საკუთარი შვილების მიერ მართულ ოთხ საოჯახო ფონდს გადასცეს.

გადაწყვეტილება ჯეფრი ეპშტეინთან ბილ გეიტსის კავშირების შესახებ გავრცელებულ ინფორმაციას მოჰყვა. ბაფეტის თქმით, ეპშტეინთან დაკავშირებული მასალების გასაჯაროების შემდეგ მას და გეიტსს ერთმანეთთან აღარ უსაუბრიათ.

2006 წლიდან ბაფეტმა გეიტსის ფონდს 47 მილიარდ დოლარზე მეტი შესწირა, თუმცა ამიერიდან მისი ქონების დიდი ნაწილი საოჯახო საქველმოქმედო ორგანიზაციებში გადანაწილდება. ბილ გეიტსი ეპშტეინთან ურთიერთობის გამო სინანულს გამოთქვამს. მისი განმარტებით, მათ შორის შეხვედრები მხოლოდ საქველმოქმედო საკითხებს ეხებოდა და მას რაიმე დანაშაულებრივ საქმიანობაში მონაწილეობა არ მიუღია.

გეიტსის ფონდში აცხადებენ, რომ ბაფეტის მრავალწლიანი მხარდაჭერისთვის მადლიერნი არიან და მუშაობას ჩვეულ რეჟიმში გააგრძელებენ. ორგანიზაციის ცნობით, ფონდს საკმარისი ფინანსური რესურსი აქვს, რათა საქმიანობა 2045 წლამდე განაგრძოს.

ბაფეტის გეგმის თანახმად, მისი გარდაცვალების შემდეგ დარჩენილი ქონების 99.5%-ს შვილები საქველმოქმედო ფონდის მეშვეობით განკარგავენ.

წყარო: Investing.com