Alibaba Lingxi Games-ს $1.5 მილიარდად ყიდის

Alibaba Group სათამაშო სტუდია Lingxi Games-ს ყიდის. გარიგების შედეგად კომპანიის ღირებულებამ შესაძლოა 1.5 მილიარდ დოლარს გადააჭარბოს. Bloomberg-ის ინფორმაციით, Lingxi Games-ს აზიური საინვესტიციო კომპანია Trustar Capital შეიძენს.

Lingxi Games-ის აღმასრულებელი დირექტორის, ჟოუ ბინშუს განცხადებით, Alibaba-ს გადაწყვეტილება კომპანიის ძირითად მიმართულებებზე მეტი რესურსის გამოყოფას უკავშირდება.

Alibaba ბოლო პერიოდში ბიზნესის რეორგანიზაციას ახორციელებს, კომპანიის მთავარი მიმართულებები ხელოვნური ინტელექტი და ღრუბლოვანი ტექნოლოგიებია. Bloomberg-ის ცნობით, Alibaba მომდევნო ხუთ წელიწადში ხელოვნური ინტელექტიდან 100 მილიარდი დოლარის შემოსავლის მიღებას გეგმავს.

კომპანიამ ცოტა ხნის წინ საკუთარი ყველაზე დიდი AI მოდელიც წარადგინა, რომლის შესაძლებლობებს Anthropic-ის ტექნოლოგიას ადარებს.

Lingxi Games-ის ყველაზე ცნობილი პროდუქტია მრავალმომხმარებლიანი სტრატეგიული თამაში Three Kingdoms: Strategy Edition, რომელიც იაპონურ Koei Tecmo-სთან თანამშრომლობით შეიქმნა.

წყარო: Investing.com