Apple ჩინური მეხსიერების ჩიპების გამოყენებას განიხილავს

ხელოვნური ინტელექტის სწრაფმა განვითარებამ მეხსიერების ჩიპებზე მოთხოვნა მკვეთრად გაზარდა და ბაზარზე დეფიციტი შექმნა, შესაბამისად, Apple ახალი მომწოდებლების მოძიებას ცდილობს. Wall Street Journal-ის ინფორმაციით, კომპანია უკვე ამოწმებს ჩინური CXMT-ის ჩიპებს, რომლებიც მომავალში შესაძლოა iPhone-სა და MacBook-ში გამოიყენოს.

მოლაპარაკებები ჯერ საწყის ეტაპზეა. არსებული ინფორმაციით, Apple ჩინურ ჩიპებს, სავარაუდოდ, მხოლოდ იმ მოწყობილობებში გამოიყენებს, რომლებიც ჩინეთის ბაზრისთვის იქნება განკუთვნილი.

CXMT ჩინეთის ერთ-ერთი უმსხვილესი მეხსიერების ჩიპების მწარმოებელია. კომპონენტების დეფიციტის გამო მის პროდუქციას უკვე იყენებენ HP და Acer იმ ლეპტოპებში, რომლებიც აშშ-ის ფარგლებს გარეთ იყიდება.

ამავე დროს, CXMT წარმოების გაზრდას გეგმავს და პეკინში მეორე ქარხნის მშენებლობას განიხილავს. Apple-სა და CXMT-ს შესაძლო თანამშრომლობაზე ოფიციალურად ჯერ არ განუცხადებიათ.

წყარო: Investing.com