Apple-მა განახლებული Siri წარადგინა: Google-ის ტექნოლოგია და ახალი შესაძლებლობები

Apple-მა Siri-ს ახალი ვერსია წარადგინა, რომელიც ხმოვანი ასისტენტის ფუნქციებს მნიშვნელოვნად აფართოებს. განახლებული სისტემა მომხმარებელს აპლიკაციებში არსებული ინფორმაციის მოძებნასა და ყოველდღიური დავალებების შესრულებაში დაეხმარება.

ახალი Siri შეძლებს კონტექსტის უკეთ გაგებას. მაგალითად, თუ მომხმარებელს მიმოწერაში რაიმე რეკომენდაცია აქვს ნახსენები, სისტემა ამ ინფორმაციას თავად მოძებნის და დამატებითი აპლიკაციების გახსნა საჭირო აღარ იქნება.

განახლების მნიშვნელოვანი ნაწილი Google-ის ტექნოლოგიას უკავშირდება. გავრცელებული ინფორმაციით, Apple-მა საკუთარი მოდელების არასაკმარისი შედეგების შემდეგ Google-ის Gemini მოდელების გამოყენება გადაწყვიტა. თუმცა კომპანიაში აცხადებენ, რომ Siri Google-ის ასისტენტის ასლი არ არის. Apple-მა საკუთარი მოდელებიც შექმნა და ისინი Gemini-ს მონაცემების დახმარებით გააუმჯობესა.

მონაცემების დაცვისთვის კომპანია Private Cloud Compute-ს იყენებს. ეს ნიშნავს, რომ რთული დავალებები Apple-ის დაცულ სერვერებზე მუშავდება ისე, რომ მომხმარებლის ინფორმაციაზე წვდომა თავად კომპანიასაც არ ჰქონდეს. უფრო რთული ამოცანებისთვის სისტემა Nvidia-ს ჩიპებს Google-ის სერვერებზე გამოიყენებს, თუმცა იქ მხოლოდ Apple-ის მიერ დამოწმებული პროგრამული უზრუნველყოფა იმუშავებს.

განახლებული Siri მომხმარებლებისთვის ბეტა ვერსიის სახით ამ შემოდგომიდან გახდება ხელმისაწვდომი.

წყარო: Yahoo Finance