Applied Materials Besi-ში წილს 20%-მდე ზრდის

ამერიკული Applied Materials ნიდერლანდურ BE Semiconductor Industries-ში (Besi) საკუთარ წილს დაახლოებით 20%-მდე გაზრდის. ორივე კომპანია ნახევარგამტარების წარმოებისთვის საჭირო ტექნოლოგიებზე მუშაობს და წლებია თანამშრომლობს.

Applied Materials-მა Besi-ის აქციების 9% 2025 წლის აპრილში შეიძინა. მათი თანამშრომლობის ერთ-ერთი მთავარი მიმართულება ჩიპების ერთმანეთთან დაკავშირების ტექნოლოგიაა, რომელიც ახალი თაობის ხელოვნური ინტელექტის პროცესორების წარმოებაში გამოიყენება.

Applied Materials-ის გადაწყვეტილების შემდეგ Besi-ის აქციები ამსტერდამის ბირჟაზე თითქმის 9%-ით გაძვირდა. ბაზარზე გაჩნდა ვარაუდიც, რომ ამერიკულმა კომპანიამ მომავალში Besi-ის სრულად შეძენა შეიძლება განიხილოს. ამ ეტაპზე Applied Materials ამას არ ადასტურებს. კომპანია აცხადებს, რომ Besi-ში წილის 20%-ზე მეტად გაზრდას და მის სამეთვალყურეო საბჭოში ადგილის დაკავებას არ გეგმავს.

გარიგებას აშშ-ის ანტიმონოპოლიური უწყების თანხმობა სჭირდება. დამატებითი სირთულე შეიძლება იყოს ისიც, რომ ორივე კომპანიას ჩინეთში მნიშვნელოვანი ბიზნესი აქვს. Applied Materials-ის 2025 წლის შემოსავლის დაახლოებით 30% სწორედ ჩინეთზე მოდიოდა.

წყარო: Reuters