აშშ აყოვნებს სანქციების დაწესებას ჩინური ტექნოლოგიური გიგანტების წინააღმდეგ

მიუხედავად იმისა, რომ უსაფრთხოების სამსახურები ჩინურ ხელოვნური ინტელექტის სტარტაპსა და ჩიპების მსხვილ მწარმოებელ კომპანიას საფრთხედ მიიჩნევენ, ვაშინგტონი მათ წინააღმდეგ მკაცრი ეკონომიკური ზომების მიღებას ჯერჯერობით თავს არიდებს. როგორც ცნობილია, აშშ-ის პრეზიდენტის ადმინისტრაციამ გადადო ჩინური ხელოვნური ინტელექტის სტარტაპის DeepSeek-ისა და მეხსიერების ჩიპების მწარმოებელი კომპანიის CXMT-ის სავაჭრო „შავ სიაში" შეყვანა. მართალია, შესაბამის გადაწყვეტილებას უწყებათაშორისი კომიტეტი ჯერ კიდევ გასულ წელს დაეთანხმა, ვაშინგტონი ამ ნაბიჯის საჯაროდ გამოცხადებას ამჟამად არ ჩქარობს.

ეს გადაწყვეტილება მცდელობაა, თავიდან იქნას აცილებული პეკინთან ისედაც დაძაბული ურთიერთობების კიდევ უფრო გამწვავება. ამჟამად აშშ-ის ვაჭრობის დეპარტამენტის სპეციალურ სიაში მოსახვედრად რიგში 100-ზე მეტი კომპანია დგას, რომელთაგან 75-ზე მეტი ჩინური სუბიექტია.

აღსანიშნავია, რომ ამერიკელი მაღალჩინოსნები DeepSeek-ს ჩინეთის სამხედრო და სადაზვერვო ოპერაციების მხარდაჭერაში ადანაშაულებენ, ხოლო CXMT პენტაგონის მიერ ოფიციალურად ჩინურ სამხედრო კომპანიად არის მიჩნეული.

ამ სიაში მოხვედრა კომპანიებისთვის სერიოზულ შეზღუდვას ნიშნავს: ისინი ამერიკული პროდუქციის, პროგრამული უზრუნველყოფისა და ტექნოლოგიების შესაძენად სპეციალური ლიცენზია გახდებათ საჭირო. საგულისხმოა, რომ 2025 წლის ოქტომბრის შემდეგ აშშ-ს ამ სიას ახალი სუბიექტები არ დაუმატებია - ეს ბოლო ათწლეულის განმავლობაში მსგავსი გადაწყვეტილებების მიღებაში ყველაზე ხანგრძლივი პაუზაა.

წყარო: Investing.com