აშშ-ში ახალშობილებისთვის „ტრამპის ანგარიშები“ ამოქმედდება

ამერიკის შეერთებულ შტატებში ახალი სახელმწიფო პროგრამა იწყება, რომლის ფარგლებშიც ახალშობილებს სპეციალურ საინვესტიციო ანგარიშებს გაუხსნიან. პროგრამა აშშ-ის 250 წლისთავთან დაკავშირებით ამოქმედდება და ბავშვებისთვის თანხის დაგროვებასა და ინვესტირებას ითვალისწინებს.

აშშ-ის მთავრობის გადაწყვეტილებით, ახალშობილებისთვის შექმნილ ე.წ. „ტრამპის ანგარიშებზე“ თანხის ან აქციების ჩარიცხვა ფიზიკურ პირებსა და კომპანიებსაც შეეძლებათ. პროგრამა ოფიციალურად შაბათს ამოქმედდება და პრეზიდენტ დონალდ ტრამპის საგადასახადო და საიმიგრაციო რეფორმების პაკეტში შედის.

პროგრამის მიხედვით, 2025 წლიდან 2028 წლამდე დაბადებული თითოეული ბავშვისთვის სახელმწიფო საწყის კაპიტალად 1000 აშშ დოლარს გამოყოფს. ანგარიშის გასახსნელად მშობელმა ან მეურვემ სპეციალური ფორმა, 4547, უნდა შეავსოს.

ანგარიშის მართვაზე პასუხისმგებელი მშობელი ან მეურვე იქნება. აშშ-ის ხაზინის დეპარტამენტმა უკვე გამოაქვეყნა ხუთი საინვესტიციო ფონდი, რომლებიც უოლ-სტრიტის წამყვან ინდექსებს ეფუძნება.

პროგრამაში ამ დროისთვის 6 მილიონზე მეტი ოჯახია დარეგისტრირებული. სახელმწიფო დაფინანსებას მხოლოდ 1.4 მილიონი ბავშვი მიიღებს, თუმცა სხვა მშობლებიც ხსნიან ასეთ ანგარიშებს, რადგან პროგრამა საგადასახადო შეღავათებს ითვალისწინებს.

ანგარიშზე დაგროვილი თანხა ბავშვის 18 წლამდე არ დაიბეგრება. სხვა მსგავს პროგრამებთან შედარებით, ამ ანგარიშებზე თანხის გამოყენებას ნაკლები შეზღუდვა ექნება.

წყარო: Yahoo Finance