Emirates-მა ავიაბილეთებზე კრიპტოვალუტით გადახდა დაამატა
ავიაკომპანია Emirates-ი მგზავრებს ავიაბილეთების კრიპტოვალუტით შეძენის შესაძლებლობას აძლევს. 28 ივლისიდან Crypto.com Pay-ის ფუნქცია კომპანიის ვებსაიტსა და მობილურ აპლიკაციაში გამოჩნდა, რის შედეგადაც Crypto.com-ის მომხმარებლებს თანხის პირდაპირ ციფრული საფულიდან გადახდა შეუძლიათ.
კრიპტოვალუტით გადახდა ამ ეტაპზე არაბთა გაერთიანებულ საამიროებში მცხოვრებ მომხმარებლებს შეუძლიათ, თუ ბილეთის ფასი დირჰამშია მითითებული. ეს ვარიანტი Emirates-ის ვებსაიტსა და აპლიკაციაში, გადახდის ეტაპზე გამოჩნდება.
Emirates-მა და Crypto.com-მა თანამშრომლობის შეთანხმებას 2025 წლის ივლისში მოაწერეს ხელი. ავიაკომპანიის კომერციული დირექტორის, ადნან ქაზიმის განცხადებით, ახალი ფუნქცია მომხმარებლებს გადახდის უფრო მეტ არჩევანს აძლევს და განსაკუთრებით იმ ახალგაზრდა მგზავრებზეა გათვლილი, რომლებიც ფინანსურ ოპერაციებსა და მოგზაურობის დაგეგმვას ძირითადად ტელეფონით ახორციელებენ.
Emirates მსოფლიოში ერთ-ერთი უმსხვილესი საერთაშორისო ავიაკომპანიაა და კომპანიის მონაცემებით, ყველაზე მომგებიანიც. 2026 წლის 31 მარტს დასრულებულ ფინანსურ წელს მისმა მოგებამ რეკორდულ 19.7 მილიარდ დირჰამს, დაახლოებით 5.4 მილიარდ დოლარს მიაღწია, შემოსავალმა კი დაახლოებით 41 მილიარდი დოლარი შეადგინა.
1985 წელს დაარსებული Emirates დუბაის საინვესტიციო კორპორაციას ეკუთვნის. ავიაკომპანია 140-ზე მეტ მიმართულებას ემსახურება და Airbus A380-ისა და Boeing 777-ის უმსხვილესი ოპერატორია.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
