Google ჩინეთში Pixel-ის წარმოებას წყვეტს

Google-მა გადაწყვიტა, რომ 2027 წლისთვის ჩინეთში საკუთარი მოწყობილობების წარმოებას სრულად შეაჩერებს. საუბარია არა მხოლოდ Pixel-ის სმარტფონებზე, არამედ ჭკვიან საათებსა და უსადენო ყურსასმენებზეც. სამაგიეროდ, Google წარმოების ვიეტნამსა და ინდოეთში გადატანას გეგმავს.

მომავალი წლიდან Pixel-ის ყველა ახალი მოდელი ჩინეთის ფარგლებს გარეთ დამზადდება. გადაწყვეტილებას ხელი შეუწყო ვიეტნამში Pixel-ის მაღალი კლასის სმარტფონების წარმოების წარმატებულმა გამოცდილებამ, რის შემდეგაც Google-მა პროცესის დაჩქარება გადაწყვიტა.

Google Samsung Electronics-ის შემდეგ მეორე მსხვილი გლობალური კომპანიაა, რომელმაც ჩინეთიდან წარმოების გადატანა გადაწყვიტა.

მიუხედავად იმისა, რომ ბოლო პერიოდში მეხსიერების ჩიპების ღირებულება მნიშვნელოვნად გაიზარდა, Google წელს Pixel-ის გაყიდვების 8-10%-იან ზრდას პროგნოზირებს. გასულ წელს კომპანიამ დაახლოებით 12 მილიონი სმარტფონი გაყიდა.

წყარო: Investing.com