Google-მა ნახშირორჟანგის შემცირებაზე ყველაზე დიდი შეთანხმება გააფორმა
Google-მა კომპანიის ისტორიაში ყველაზე დიდი შეთანხმება გააფორმა, რომელიც ატმოსფეროში ნახშირორჟანგის შემცირებას ეხება. პროექტი ბრაზილიაში განხორციელდება და 2030 წლამდე ატმოსფეროში ნახშირორჟანგის რაოდენობა 200,000 ტონით უნდა შემცირდეს. ხარჯებს Google დაფარავს.
პროექტს ბრაზილიური კომპანია Mombak განახორციელებს. კომპანია ამაზონის რეგიონში დაზიანებულ საძოვრებს ადგილობრივი სახეობის ხეებით აღადგენს. ხეების ზრდასთან ერთად ატმოსფეროდან ნახშირორჟანგი შეიწოვება.
Google გარიგების ფინანსურ პირობებს არ ასაჯაროებს. კომპანიის მიზანი მხოლოდ საკუთარი ემისიების კომპენსირება არ არის. Google იმედოვნებს, რომ ასეთი მასშტაბური შეკვეთები ატმოსფეროში ნახშირორჟანგის შემცირების პროექტებს გააფართოებს და მათ ღირებულებასაც შეამცირებს.
ტექნოლოგიური კომპანიებისთვის ეს საკითხი განსაკუთრებით აქტუალური გახდა მონაცემთა ცენტრების სწრაფი ზრდის გამო. AI სისტემების განვითარებას დიდი რაოდენობით ელექტროენერგია სჭირდება, რის გამოც Google-ის ენერგომოხმარებაც იზრდება.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
