Gucci-მ „Made in China“ წარწერით ახალი სნიკერები გაყიდვაში გამოუშვა

Gucci-მ ახალი ძვირადღირებული სნიკერების გაყიდვა დაიწყო, რომლებსაც „Made in China“ წარწერა აქვს. ეს იტალიურ წარმოებასთან დაკავშირებული ბრენდის ტრადიციიდან გადახვევაა და ინდუსტრიის ზოგიერთი წარმომადგენლის შეფასებით, შესაძლოა Gucci-ის პრემიუმ იმიჯზე გავლენა მოახდინოს.

გადაწყვეტილება აჩვენებს იმ გამოწვევას, რომლის წინაშეც Gucci-ის კრეატიული დირექტორი დემნა დგას — მან ინოვაციური პროდუქციის შექმნა ხარჯების კონტროლთან უნდა დააბალანსოს, რათა ბრენდმა ე.წ. aspirational მომხმარებლები, ანუ ლუქს-საქონლის ძირითადი მყიდველები, კვლავ მოიზიდოს. ეს მომხმარებლები სუპერმდიდარ მომხმარებლებთან შედარებით ფასების მიმართ უფრო მგრძნობიარეები არიან.

დემნა ახალ კოლექციას მილანში, პარასკევს გამართულ ჩვენებაზე წარადგენს. მისი საქმიანობის შედეგები განსაკუთრებით მნიშვნელოვანია Gucci-ის მშობელი კომპანიისთვის, Kering-ისა და მისი აღმასრულებელი დირექტორის, ლუკა დე მეოსთვის. დე მეომ კომპანიის ხელმძღვანელობა გასულ წელს ჩაიბარა და ჯგუფის ფინანსური მდგომარეობის გაუმჯობესება დაისახა მიზნად, თუმცა აქციების თავდაპირველი ზრდა წელს გაგრძელებული არ ყოფილა.

Kering-ის მთავარი ბრენდის, Gucci-ის გაყიდვები ბოლო სამი წლის განმავლობაში დაახლოებით განახევრდა, რამაც მარჟებზე ზეწოლა გაზარდა და ჯგუფს ათობით მაღაზიის დახურვა აიძულა.

დემნამ, Balenciaga-ში მუშაობის პერიოდის მსგავსად, Gucci-სთვის ფუტურისტული დიზაინის სნიკერი შექმნა, სახელწოდებით Drip. Gucci-ის ვებგვერდის მიხედვით, მოდელს „Made in China“ აწერია. Reuters-მა იგივე წარწერით აღნიშნული Drip-ის სნიკერები პარიზის Gucci-ის მაღაზიაშიც ნახა.

Gucci-ში აცხადებენ, რომ იტალია კომპანიის წარმოების მოდელისა და იდენტობის „ყოველთვის ცენტრალურ ნაწილად დარჩება“. თუმცა, ბრენდის განცხადებით, ჩინურ მწარმოებელთან თანამშრომლობის გადაწყვეტილება კონკრეტული ტექნოლოგიური მოთხოვნებით იყო განპირობებული — მსგავსი მიდგომა კომპანიას შვეიცარიულ და იაპონურ მომწოდებლებთან თანამშრომლობისასაც გამოუყენებია, მათ შორის საათებისა და სათვალეების წარმოებაში.

კომპანიის განცხადებით, შერჩეულ ჩინურ პარტნიორს ჰქონდა ის ტექნოლოგიური ცოდნა და შესაძლებლობები, რომლებიც კონკრეტული პროდუქტის ხარისხისა და ტექნიკური მახასიათებლების მისაღწევად იყო საჭირო. ამასთან, Gucci-ის წარმომადგენლის თქმით, ბრენდს წარმოების უფრო ფართოდ იტალიის ფარგლებს გარეთ გადატანის გეგმა არ აქვს.

Drip, რომელიც Gucci-ის ვებგვერდზე დემნას მიერ ბრენდისთვის შექმნილ პირველ სნიკერად არის აღწერილი, გაყიდვაში გასულ თვეში, Primavera-ს კოლექციის ფარგლებში გამოვიდა. მისი ფასი ევროპაში დაახლოებით €800-ს, ხოლო აშშ-ში $1,000-ს შეადგენს. მოდელი Gucci-ის სხვა ფეხსაცმელებთან შედარებით იაფია, თუმცა კვლავ ლუქს-სეგმენტში რჩება. სნიკერი ნეილონის, ტილოს ან ზამშის მასალისგან მზადდება.

კოლექციის კიდევ ერთი ტყავის, უსამაგრო სნიკერიც „Made in China“ წარწერით იყიდება. Gucci-ის განცხადებით, მისი ჩინეთში წარმოებაც კონკრეტული დიზაინის ტექნიკურ მოთხოვნებს უკავშირდება. კომპანიის ვებგვერდზე მითითებული ყველა სხვა Gucci-ის ფეხსაცმელი, რომელზეც წარმოების ქვეყანა წერია, იტალიაშია დამზადებული.

ჩინეთი სნიკერების წარმოების გლობალური ცენტრია და მისი მწარმოებლები როგორც მასობრივი, ისე პრემიუმ ბრენდებისთვის მუშაობის გამოცდილებით გამოირჩევიან. თუმცა, ზოგიერთი ანალიტიკოსი მიიჩნევს, რომ Gucci-ის შემთხვევაში იტალიური წარმოების ტრადიციიდან გადახვევამ შესაძლოა ბრენდის პოზიციონირებასთან დაკავშირებით კითხვები გააჩინოს.

Berenberg-ის ანალიტიკოსების შეფასებით, წარმოშობის ქვეყანა და ის, თუ როგორ აღიქვამენ მომხმარებლები ბრენდის ლუქს-პოზიციონირებას, ერთმანეთთან გარკვეულ წინააღმდეგობაში შეიძლება მოვიდეს. ამასთან, Kering-ის ორი წყაროს ცნობით, Gucci-მ ჩინეთში, მათ შორის, რამდენიმე პროდუქტზე ფასების შემცირებაც დაიწყო ბაზრის წილის დასაბრუნებლად.

ფასების შემცირება ინვესტორებისთვის მოულოდნელი აღმოჩნდა და ახლა ისინი ყურადღებით აკვირდებიან Gucci-ის სხვა ნაბიჯებსაც, რომლებმაც შესაძლოა მომხმარებლების მიერ ბრენდის ფასისა და ღირებულების აღქმაზე იმოქმედოს.