McDonald’s ფრენჩაიზების მხარდასაჭერად $8.5 მილიარდს გამოყოფს

McDonald’s მომდევნო ათი წლის განმავლობაში ფრენჩაიზების მხარდასაჭერად 8.5 მილიარდ დოლარს გამოყოფს. მაღალი ინფლაციის გამო კომპანია მომხმარებელთა რაოდენობის სწრაფ ზრდას აღარ ელოდება.

აღმასრულებელი დირექტორის, კრის კემპჩინსკის თქმით, სწრაფი კვების სექტორში მომხმარებელთა რაოდენობა შესაძლოა აღარ გაიზარდოს. გასულ კვარტალში McDonald’s-ის გაყიდვების ზრდამ აშშ-ში პროგნოზს ვერ მიაღწია. დაბალი შემოსავლის მქონე მომხმარებლები რესტორნებში ნაკლებად დადიან, ხოლო უფრო იაფი შეთავაზებების მქონე კონკურენტები McDonald’s-ზე ზეწოლას აძლიერებენ.

$8.5-მილიარდიანი პაკეტიდან დაახლოებით $5 მილიარდი 2030 წლამდე დაიხარჯება. ფრენჩაიზები მიიღებენ შეღავათებს ქირასა და ახალი პროექტების დაფინანსებაზე. McDonald’s რესტორნების განახლებას, თანამშრომლების მომზადებასა და AI-ზე დაფუძნებული ArchIQ სისტემის გავრცელებასაც აპირებს.

კომპანია მენიუს შეცვლაზეც მუშაობს. განიხილება მეტი ცილის შემცველი კერძები, მათ შორის გრილზე მომზადებული ქათამი, კვერცხის მცირე ულუფები და თასში მოთავსებული კერძები. McDonald’s-ის მიზანია, 2030 წლისთვის საოპერაციო მოგების მარჟამ 50%-ს გადააჭარბოს.

წყარო: Reuters