Meta-მ ახალი აპლიკაცია Pocket გამოუშვა
Meta-მ ახალი აპლიკაცია Pocket გამოუშვა, რომელიც მომხმარებლებს ხელოვნური ინტელექტის დახმარებით ინტერაქციული თამაშებისა და ციფრული სცენების შექმნის საშუალებას აძლევს.
აპლიკაციის მუშაობის პრინციპი მარტივია: მომხმარებელი წერს, რა ტიპის თამაში ან მოძრავი ობიექტი სურს, ხოლო Pocket ამ აღწერის მიხედვით ქმნის შესაბამის კონტენტს. მაგალითად, მომხმარებელს შეუძლია ტექსტურად მიუთითოს, რომ სურს პატარა თამაში მფრინავი პერსონაჟით, მუსიკით ან მოძრავი ელემენტებით და აპლიკაცია ამას ავტომატურად შექმნის.
Pocket-ში შექმნილ ასეთ პატარა ციფრულ ნამუშევრებს „gizmo-ები“ ეწოდება. ისინი შეიძლება რეაგირებდნენ ეკრანზე შეხებაზე, ტელეფონის დახრაზე, ხმაზე, მუსიკაზე ან კამერის გამოყენებაზე. მარტივად რომ ვთქვათ, ეს არის პატარა ინტერაქციული გამოცდილება, რომლის შექმნაც პროგრამირების ცოდნის გარეშე შეიძლება. აპლიკაციას სოციალური ქსელის ფორმატიც აქვს. მომხმარებლებს შეუძლიათ თავიანთი შექმნილი ნამუშევრები სხვებს გაუზიარონ და ასევე ნახონ, რას ქმნიან სხვა ადამიანები სხვადასხვა ქვეყნიდან.
Pocket ამ ეტაპზე Google Play Store-ში მხოლოდ შერჩეულ რეგიონებშია ხელმისაწვდომი. პროექტის განვითარებისთვის Meta-მ Atma Sciences Inc.-ის გუნდი შეიძინა. სწორედ ამ გუნდმა შექმნა მანამდე მსგავსი აპლიკაცია Gizmo. გარიგების ფინანსური დეტალები არ საჯაროვდება, თუმცა ცნობილია, რომ Meta-მ მიიღო როგორც გუნდი, ისე მათი ტექნოლოგიის გამოყენების უფლება.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
