ნიუ-ჯერსის შტატი Amazon-ს უჩივის

ნიუ-ჯერსის შტატმა Amazon-ის წინააღმდეგ ფედერალურ სასამართლოში სარჩელი შეიტანა. შტატის ხელისუფლება კომპანიას დამოუკიდებელი საკურიერო კომპანიებისა და მათი მძღოლების მიმართ ანტიკონკურენტულ პრაქტიკაში ადანაშაულებს.

პროკურატურის მტკიცებით, Amazon-ი Delivery Service Partner-ის პროგრამაში ჩართულ პარტნიორებს ისეთ პირობებს უწესებს, რომლებიც მძღოლების ანაზღაურებასა და სამუშაო პირობებზე უარყოფითად აისახება. სარჩელში ასევე ნათქვამია, რომ კომპანია ზღუდავს პარტნიორი კომპანიების შესაძლებლობას, ერთმანეთის თანამშრომლები აიყვანონ, და ხელს უშლის მძღოლების პროფკავშირებში გაერთიანებას.

ნიუ-ჯერსის გენერალური პროკურორის განცხადებით, ეს პირველი შემთხვევაა, როდესაც შტატი მონოფსონიასთან დაკავშირებულ სავარაუდო დარღვევაზე სასამართლოს მიმართავს. მონოფსონია ისეთი მდგომარეობაა, როდესაც ბაზარზე ერთი მსხვილი დამსაქმებელი იმდენად დიდ გავლენას ფლობს, რომ შრომის პირობებსა და ანაზღაურებაზე ფაქტობრივად თავად ახდენს გავლენას.

Amazon-ი ბრალდებებს უარყოფს. კომპანიის წარმომადგენლის განცხადებით, პარტნიორი კომპანიები დამოუკიდებლად მართავენ საკუთარ საქმიანობას, ხოლო თანამშრომლებს აქვთ როგორც დამსაქმებლის შეცვლის, ისე პროფკავშირში გაწევრიანების სრული უფლება.

ეს Amazon-ის წინააღმდეგ მიმდინარე ერთადერთი ანტიმონოპოლიური საქმე არ არის. კომპანიას მსგავსი სამართლებრივი დავები აშშ-ის ფედერალურ სავაჭრო კომისიასა და კალიფორნიის შტატთანაც აქვს.

წყარო: Investing.com