OpenAI-მ ChatGPT Business-ის ახალი ტარიფი წარადგინა
OpenAI-მ ChatGPT Business-ის მომხმარებლებისთვის ახალი შეთავაზება დაამატა. კომპანია ბიზნესკლიენტებისთვის მომსახურებას აფართოვებს, პარალელურად კი საფონდო ბირჟაზე გასასვლელად ემზადება.
ახალი შეთავაზება თვეში ერთ მომხმარებელზე 125 დოლარი ეღირება, წლიური გადახდის შემთხვევაში კი ფასი 100 დოლარამდე შემცირდება. OpenAI-ის ინფორმაციით, მომხმარებლები ChatGPT Business-ის სტანდარტულ ვერსიასთან შედარებით ხუთჯერ მეტი გამოყენების შესაძლებლობას მიიღებენ. შედარებისთვის, სტანდარტული პაკეტის ფასი თვეში 25 დოლარია, წლიური გადახდის შემთხვევაში კი 20 დოლარი.
OpenAI ბოლო პერიოდში ბიზნესისთვის განკუთვნილ პროდუქტებს აქტიურად აფართოებს. ამ ბაზარზე მისი ერთ-ერთი მთავარი კონკურენტი Anthropic-ია, რომელსაც Teams-ისთვის ანალოგიური ფასები აქვს. კომპანიამ მსხვილი კორპორაციული მომხმარებლების მოზიდვა განსაკუთრებით პროგრამირებისთვის შექმნილი Claude Code-ის საშუალებით შეძლო. OpenAI ამ მიმართულებით საკუთარ Codex-ს ავითარებს.
კონკურენცია სამუშაო პროცესებისთვის განკუთვნილ პროდუქტებზეც იზრდება. Anthropic-მა იანვარში Claude Cowork წარადგინა, OpenAI-მ კი ივლისში ChatGPT Work გამოუშვა. ორივე კომპანია კორპორაციული მომხმარებლებისგან მიღებული შემოსავლების გაზრდას ცდილობს.
OpenAI და Anthropic საფონდო ბირჟაზე გასასვლელადაც ემზადებიან და ივნისში აშშ-ის ფასიანი ქაღალდებისა და ბირჟების კომისიას შესაბამისი დოკუმენტები კონფიდენციალურად წარუდგინეს. Anthropic-ის IPO მიმდინარე წლის ბოლოს არის მოსალოდნელი, OpenAI-ის შემთხვევაში კი ბირჟაზე გასვლა შესაძლოა 2027 წლამდე გადაიდოს.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
