ოქროს ფასი $4,400-იან ნიშნულს უახლოვდება: რა ფაქტორები განაპირობებს ძვირფასი ლითონის გაძვირებას?

ორშაბათს, 17 აგვისტოს, გლობალურ ბაზარზე ოქროს ფასი გაიზარდა და უნციაზე $4,400-იან ნიშნულს მიუახლოვდა. ძვირფას ლითონზე მოთხოვნის ზრდა აშშ დოლარის შესუსტებამ, ამერიკის ეკონომიკურმა მაჩვენებლებმა და ახლო აღმოსავლეთში არსებულმა გეოპოლიტიკურმა დაძაბულობამ განაპირობა.

ვაჭრობის პროცესში ოქროს მიმდინარე საბაზრო ფასი 0.5%-ით გაიზარდა და $4,399.44 შეადგინა, ხოლო ოქროს ფიუჩერსების ფასი $4,455.90 იყო. ამავე დროს, აშშ დოლარის ინდექსი (USDIDX) 0.2%-ით შემცირდა და 99.49 შეადგინა. დოლარის შესუსტებამ ოქროზე მოთხოვნას ხელი შეუწყო, რადგან სხვა ვალუტების მფლობელებისთვის მისი შეძენა შედარებით იაფი გახდა.

ანალიტიკოსების განმარტებით, ოქროს პოზიციების გამყარებას ხელი შეუწყო აშშ-ის ბოლო ეკონომიკურმა მონაცემებმა: ბოლო სამი თვის განმავლობაში პირველად შემცირდა სამომხმარებლო განწყობის ინდექსი. საცალო გაყიდვები ბოლო ერთი წლის განმავლობაში ყველაზე მკვეთრად შემცირდა.

აღნიშნულმა მაჩვენებლებმა შეამცირა მოლოდინი იმის შესახებ, რომ ფედერალური სარეზერვო სისტემა (Fed) მონეტარული პოლიტიკის გამკაცრებას გააგრძელებს, რაც ტრადიციულად პოზიტიურად აისახება ოქროს ფასზე.

ამასთან, ინფლაციური რისკები კვლავ მაღალია. გასული კვირის ბოლოს ჰორმუზის სრუტეში რამდენიმე გემზე განხორციელებულმა თავდასხმამ ენერგომატარებლების მიწოდების შეფერხების შიში გააჩინა. ნავთობის ფასის შესაძლო ზრდამ, თავის მხრივ, შესაძლოა ინფლაცია დააჩქაროს, რაც ცენტრალურ ბანკებს მონეტარული პოლიტიკის შერბილებაში ხელს შეუშლის.

ამ ფონზე, ინვესტორები განსაკუთრებული ყურადღებით ელიან ოთხშაბათს ფედერალური სარეზერვო სისტემის ივლისის სხდომის ოქმების გამოქვეყნებას.

ოქროზე მოთხოვნას ცენტრალური ბანკების შესყიდვებიც ზრდის. ANZ-ის მონაცემებით, 2026 წლის პირველ კვარტალში ცენტრალურმა ბანკებმა ჯამში 244 ტონა ოქრო შეიძინეს, ხოლო ჩინეთმა მხოლოდ აპრილში საკუთარი რეზერვები 8 ტონით გაზარდა.

ANZ-ის ანალიტიკოსების პროგნოზით, გეოპოლიტიკური გაურკვევლობისა და საერთაშორისო ურთიერთობებში დაძაბულობის ფონზე, წლის ბოლომდე ოქროს ფასმა შესაძლოა უნციაზე $5,200-ს მიაღწიოს.

წყარო: Investing.com