სამხრეთ კორეა აშშ-ში $200-მილიარდიან პროგრამას იწყებს

სამხრეთ კორეა აშშ-ის ენერგეტიკულ და ინფრასტრუქტურულ პროექტებში $200 მილიარდის ინვესტირებას გეგმავს. პროგრამის შესახებ ინფორმაციას თეთრი სახლი ავრცელებს.

გეგმა რამდენიმე მსხვილ პროექტს მოიცავს. Alaska LNG-ის მშენებლობისთვის 54 მილიარდი დოლარის გამოყოფა იგეგმება. ასევე განიხილება რვა დიდი ატომური ელექტროსადგურისა და ტეხასში 6 გიგავატი სიმძლავრის გაზზე მომუშავე ელექტროსადგურის მშენებლობა.

Alaska LNG-ის პროექტი დაახლოებით 1,300-კილომეტრიანი მილსადენის მშენებლობას ითვალისწინებს. მილსადენით ალიასკის ჩრდილოეთში მოპოვებულ გაზს სამხრეთ სანაპირომდე მიიტანენ, იქ LNG-დ გადაამუშავებენ და შემდეგ აზიის ბაზრებზე გაიტანენ. პროექტის წლიური სიმძლავრე 20 მილიონ ტონამდე იქნება.

$200-მილიარდიანი პროგრამა აშშ-სა და სამხრეთ კორეას შორის გაფორმებული სავაჭრო შეთანხმების ნაწილია. სეულს ასევე აქვს $150-მილიარდიანი გეგმა ამერიკული გემთმშენებლობის სექტორისთვის.

სამხრეთ კორეაში ზოგიერთი კანონმდებელი პროექტების ეკონომიკურ მიზანშეწონილობას ეჭვქვეშ აყენებს. ხელისუფლება კი აცხადებს, რომ თანხა მხოლოდ იმ პროექტებზე დაიხარჯება, რომლებსაც რეალური კომერციული პერსპექტივა ექნება.

წყარო: Reuters