Sanofi და Regeneron ოთხ ახალ პრეპარატზე $8-მილიარდიან შეთანხმებას აფორმებენ

Sanofi და Regeneron ანთებითი დაავადებების სამკურნალოდ ოთხ ახალ პრეპარატზე ერთად იმუშავებენ. შეთანხმების საერთო ღირებულებამ შესაძლოა 8 მილიარდ დოლარს მიაღწიოს.

Sanofi Regeneron-ს თავდაპირველად 1 მილიარდ დოლარს გადაუხდის. დარჩენილ თანხას კომპანია ეტაპობრივად გადაიხდის, თუ პრეპარატები კვლევისა და დამტკიცების ეტაპებს წარმატებით გაივლიან და გაყიდვები შეთანხმებულ მაჩვენებლებს მიაღწევს. კომპანიები ხარჯებსაც და მომავალ მოგებასაც თანაბრად გაინაწილებენ. კვლევებს Regeneron გაუძღვება, დამტკიცებული პრეპარატების საერთაშორისო გაყიდვებზე კი Sanofi იქნება პასუხისმგებელი.

პირველი პრეპარატის, REGN20423, კვლევა ატოპიური დერმატიტის სამკურნალოდ უკვე დაწყებულია, დანარჩენი სამი პრეპარატის კლინიკური კვლევები კი 2027 წელს იგეგმება.

აღსანიშნავია, რომ ახალი შეთანხმება ოთხ პრეპარატზე თანამშრომლობასთან ერთად კომპანიებს შორის არსებულ სამართლებრივ დავასაც ასრულებს.

წყარო: Investing.com