Synchrony და OpenAI ხელოვნურ ინტელექტს ონლაინვაჭრობაში გამოიყენებენ

Synchrony-მ OpenAI-სთან თანამშრომლობა დაიწყო, რომლის ფარგლებშიც კომპანია ხელოვნურ ინტელექტს მომხმარებლებისთვის დაფინანსების პირობების, სპეციალური შეთავაზებებისა და ლოიალობის პროგრამების გასაცნობად გამოიყენებს.

Synchrony საკუთარ სისტემებში OpenAI-ს მოდელებს, მათ შორის GPT-5.6 Sol-ს, Terra-სა და Luna-ს დანერგავს. თანამშრომლობა ChatGPT Work-ს, Codex-სა და AWS Bedrock-საც მოიცავს.

მომხმარებლებისთვის უკვე ხელმისაწვდომია სპეციალური პლაგინი (plugin - დამატებითი პროგრამული ფუნქცია) ChatGPT-ის კატალოგში. მისი საშუალებით კლიენტები ჩატის ფორმატში გაეცნობიან Synchrony-ის პარტნიორი კომპანიების შეთავაზებებს, აქციებსა და დაფინანსების პირობებს.

Synchrony-ში ხელოვნური ინტელექტის ხელსაწყოებს 2024 წლიდან თითქმის ყველა თანამშრომელი იყენებს. ახალი შეთანხმებით პერსონალს ChatGPT Enterprise-სა და ChatGPT Work-ზეც ექნება წვდომა. კომპანიის მონაცემებით, თანამშრომელთა 90% ენდობა ხელმძღვანელობის მიდგომას ხელოვნური ინტელექტის ეთიკურ და პასუხისმგებლიან გამოყენებასთან დაკავშირებით. კომპანია თანამშრომლებისთვის სპეციალური სასწავლო პროგრამების დაწყებასაც გეგმავს.

OpenAI-ს ვიცე-პრეზიდენტის, კეილინ ვოსის განცხადებით, ხელოვნური ინტელექტი ცვლის მომხმარებლის სავაჭრო გამოცდილებას, მათ შორის პროდუქტის მოძიებას, გადახდასა და ლოიალობის პროგრამებით სარგებლობას.

Synchrony-ის სტრატეგიული განვითარების ხელმძღვანელი მარან ნალუსვამი კი აღნიშნავს, რომ თანამშრომლობა კომპანიის მილიონობით მომხმარებელსა და ასობით ათას პარტნიორ ობიექტს შეეხება.

წყარო: Investing.com