ტარიფების ზრდის შემდეგ Shein-მა კვარტალი 99-მილიონიანი ზარალით დაასრულა
Shein-მა 2026 წლის პირველი კვარტალი 99 მილიონი დოლარის ზარალით დაასრულა. კომპანიის განმარტებით, ამის მთავარი მიზეზი აშშ-ში გაყიდვების შემცირება იყო.
Shein-ის გაყიდვებზე განსაკუთრებით იმოქმედა აშშ-ის გადაწყვეტილებამ, მცირე ღირებულების ამანათებისთვის მოქმედი საბაჟო შეღავათი გაეუქმებინა. მანამდე 800 დოლარზე ნაკლები ღირებულების ამანათები ქვეყანაში დამატებითი გადასახადის გარეშე შედიოდა. ახლა კი ჩინეთიდან აშშ-ში გაგზავნილ პროდუქციაზე 10%-დან 87.5%-მდე გადასახადი ვრცელდება.
კომპანიის ინფორმაციით, პირველი კვარტლის განმავლობაში აშშ-ში მიღებული შემოსავალი 14.3%-ით შემცირდა და 2.04 მილიარდი დოლარი შეადგინა. გაზრდილი ხარჯების დასაფარად Shein ამერიკის ბაზარზე ფასების მომატებასაც განიხილავს.
მსგავსი ცვლილებები მოსალოდნელია ევროპაშიც.
ევროკავშირმა დაბალი ღირებულების ონლაინშეკვეთებზე 3-ევროიანი მოსაკრებელი დააწესა. Shein-ის შეფასებით, ამ გადაწყვეტილებამ შესაძლოა კომპანიის საქმიანობაზე ისეთივე ან უფრო ძლიერი გავლენა მოახდინოს, როგორიც აშშ-ში საბაჟო შეღავათის გაუქმებას მოჰყვა.
2025 წელს Shein-ის შემოსავალი 8%-ით გაიზარდა და 41.85 მილიარდ დოლარს მიაღწია, თუმცა წმინდა მოგება 38.7%-ით, 2.06 მილიარდ დოლარამდე შემცირდა. ამასთან, კომპანიის ზრდის ტემპიც შენელდა.
Shein ჰონგ-კონგის ბირჟაზე გასასვლელად ემზადება. კომპანიამ ჩინეთის მარეგულირებლის თანხმობა 10 ივლისს მიიღო, თუმცა ჯერ არ დაუკონკრეტებია, როდის დაიწყებს აქციების გაყიდვას, რა იქნება მათი ფასი და რა თანხის მოზიდვას გეგმავს.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
