ტექნიკის ფასები იზრდება: რა კავშირი აქვს ამას ხელოვნურ ინტელექტთან

ხელოვნური ინტელექტის სწრაფმა განვითარებამ ტექნიკის ბაზარზეც იმოქმედა. ხელოვნური ინტელექტის სისტემებისთვის საჭირო ჩიპებზე მოთხოვნა იმდენად გაიზარდა, რომ ჩვეულებრივი მომხმარებლისთვის განკუთვნილი მოწყობილობებიც ძვირდება.

ფასების ზრდა უკვე შეეხო ისეთ კომპანიებს, როგორებიცაა Apple, Samsung, Microsoft და Sony. გაძვირდა სმარტფონები, პლანშეტები, კომპიუტერები და სათამაშო კონსოლებიც.

მთავარი მიზეზი მეხსიერების ჩიპების დეფიციტია. ხელოვნური ინტელექტის მოდელების მუშაობისთვის დიდ მონაცემთა ცენტრებს აშენებენ, სადაც დიდი რაოდენობით სპეციალური მეხსიერება, HBM, გამოიყენება. სწორედ ამაზე გაიზარდა მოთხოვნა.

ამის გამო მწარმოებლებს ნაკლები რესურსი რჩებათ იმ ტიპის მეხსიერებისთვის, რომელიც ჩვეულებრივ ტექნიკაში გამოიყენება, მაგალითად ლეპტოპებში, სმარტფონებსა და სხვა ყოველდღიურ მოწყობილობებში. შედეგად, იზრდება წარმოების ხარჯი და ეს საბოლოოდ ფასზეც აისახება. პრობლემა სწრაფად ვერ მოგვარდება. მეხსიერების ჩიპების მწარმოებელი Micron-ის განცხადებით, ახალი ქარხნების აშენებას წლები სჭირდება. ამიტომ ბაზარზე დეფიციტი მოკლე დროში ვერ გაქრება.

წლების განმავლობაში მომხმარებელი მიჩვეული იყო, რომ ტექნიკა დროთა განმავლობაში იაფდებოდა. ახლა ეს ტენდენცია შეიცვალა. ზოგიერთი ძველი მოდელიც კი გაძვირდა, მათ შორის 2017 წელს გამოშვებული Nintendo Switch.

ექსპერტების შეფასებით, თუ მეხსიერების ჩიპებზე მოთხოვნა ასეთივე მაღალი დარჩება, მომხმარებლებს ტექნიკის გაძვირებულ ფასებთან შეგუება მოუწევთ.

წყარო: Yahoo Finance