ტრამპთან დაკავშირებული კრიპტოკომპანია ჩინურ ხელოვნური ინტელექტის სტარტაპთან თანამშრომლობს

პრეზიდენტ დონალდ ტრამპის მიერ მხარდაჭერილმა კრიპტოკომპანიამ World Liberty Financial-მა პარტნიორობა დაიწყო ჰონგ-კონგურ ხელოვნური ინტელექტის სტარტაპ WorldClaw-თან. შეთანხმებამ ყურადღება მიიპყრო, რადგან WorldClaw მომხმარებლებს წვდომას სთავაზობს ისეთ ჩინურ ხელოვნური ინტელექტის მოდელებზე, რომლებსაც აშშ-ის ხელისუფლება ეროვნული უსაფრთხოების რისკად მიიჩნევს.

თანამშრომლობის ფარგლებში World Liberty-ის სტაბილკოინი USD1 WorldClaw-ის პლატფორმაზე ხელოვნური ინტელექტის მოდელებით სარგებლობის საფასურის გადასახდელად გამოიყენება. World Liberty-სა და WorldClaw-ს ერთმანეთთან რაიან ფანგიც აკავშირებს. ის World Liberty-ის ერთ-ერთი ხელმძღვანელია, WorldClaw-ში კი მრჩევლის პოზიციას იკავებს. პროექტის პოპულარიზაციაში დონალდ ტრამპის შვილები, დონალდ ტრამპ უმცროსი და ერიკ ტრამპიც მონაწილეობენ.

WorldClaw-ის პლატფორმაზე ხელმისაწვდომია 90 ხელოვნური ინტელექტის მოდელი, მათგან 43 ჩინური კომპანიების, მათ შორის Alibaba-ს, Baidu-სა და Z.ai-ის მიერ არის შექმნილი. ამავე პლატფორმაზე წარმოდგენილია OpenAI-ისა და Anthropic-ის მოდელებიც.

უსაფრთხოებასთან დაკავშირებული კითხვები განსაკუთრებით მას შემდეგ გაჩნდა, რაც Z.ai 2025 წელს აშშ-ის ვაჭრობის დეპარტამენტის სანქცირებულ კომპანიათა სიაში მოხვდა. მიმდინარე წელს კი პენტაგონმა Alibaba და Baidu იმ ჩინურ კომპანიებს შორის დაასახელა, რომლებთან თანამშრომლობაც აშშ-ის თავდაცვის დეპარტამენტისთვის აკრძალულია.

World Liberty-ის წარმომადგენლის, დევიდ ვოჩსმანის განცხადებით, WorldClaw დამოუკიდებელი კომპანიაა და ჩინური და ამერიკული AI მოდელების ერთ პლატფორმაზე შეთავაზება ტექნოლოგიურ ინდუსტრიაში გავრცელებული პრაქტიკაა.

ჯერჯერობით უცნობია, რა ფინანსურ სარგებელს იღებს ტრამპის ოჯახი ამ თანამშრომლობიდან, რადგან მხარეებს შორის გაფორმებული შეთანხმების პირობები საჯარო არ არის.

წყარო: Yahoo Finance