Unitree შანხაის ბირჟაზე აქციების განთავსებისთვის ემზადება

ჩინური რობოტექნიკის კომპანია Unitree Technology შანხაის საფონდო ბირჟაზე აქციების განთავსებისთვის ემზადება. ვარაუდობენ, რომ კომპანიის საბაზრო ღირებულება 7,4 მილიარდ დოლარს, ანუ 50 მილიარდ იუანს გადააჭარბებს.

ჰანჯოუში ბაზირებული Unitree Technology, რომელიც ბაზარზე ისეთ გიგანტებს უწევს კონკურენციას, როგორიცაა Tesla და Boston Dynamics, აქციების პირველადი განთავსების (IPO) მეშვეობით 4,2 მილიარდი იუანის მოზიდვას გეგმავს ინოვაციებისა და წარმოების გასაფართოვებლად. Citic Securities-ის პროგნოზით, დალისტვიდან ექვსი-თორმეტი თვის განმავლობაში კომპანიის საბაზრო ღირებულება 50,6-დან 55,9 მილიარდ იუანამდე მიაღწევს.

Unitree მსოფლიოში ცნობილია, როგორც მაღალტექნოლოგიური ოთხფეხა და ზოგადი დანიშნულების ჰუმანოიდური რობოტების ერთ-ერთი წამყვანი მწარმოებელი. ვინაიდან რობოტექნიკის დარგი ჩინეთისთვის სტრატეგიული მნიშვნელობისაა, კომპანიის განვითარება ჩინეთსა და აშშ-ს შორის არსებული ტექნოლოგიური მეტოქეობის ფონზე მიმდინარეობს.

მიმდინარე წლის ივნისში ვაშინგტონმა Unitree იმ კომპანიების სიაში შეიყვანა, რომლებიც, მისი მოსაზრებით, ჩინეთის სამხედრო სექტორს უწევენ დახმარებას, რის გამოც კომპანიას ამერიკულ ბაზარზე გარკვეული შეზღუდვები დაუწესდა. Unitree აქციების ფასს ხუთშაბათს დაადგენს, ინვესტორებისგან განაცხადების მიღება კი პარასკევიდან დაიწყება.

წყარო: Investing.com