40 წლის შემდეგ აშშ-ში საუდის არაბეთიდან ნავთობის იმპორტი პირველად შეწყდა
1985 წლის შემდეგ პირველად, აშშ-ს მთელი ივლისის განმავლობაში საუდის არაბეთისგან ერთი ბარელი ნავთობიც კი არ მიუღია. აღნიშნული ვაშინგტონსა და თეირანს შორის გამწვავებულმა დაპირისპირებამ გამოიწვია. რეგიონში არსებულმა კონფლიქტურმა ვითარებამ სპარსეთის ყურეში ნავთობის ტრანსპორტირება ფაქტობრივად შეუძლებელი გახადა.
აშშ-ის ენერგეტიკის დეპარტამენტის მონაცემებით, ივლისში საუდის არაბეთიდან ნავთობის მიწოდება სრულად შეწყდა. წლის დასაწყისში კი ამერიკული გადამამუშავებელი კომპანიები დღეში საშუალოდ 800 000 ბარელზე მეტ საუდურ ნავთობს ყიდულობდნენ.
საუდის არაბეთიდან მიწოდების შეწყვეტა განსაკუთრებით იმ კომპანიებს შეეხო, რომლებიც ამ ქვეყნის ნავთობს დიდი რაოდენობით იყენებენ, მათ შორის Chevron-სა და PBF Energy-ს. მათ შორისაა Motiva Enterprises-იც, რომელიც ტეხასში აშშ-ის უდიდეს ნავთობგადამამუშავებელ ქარხანას მართავს. კომპანია საუდის არაბეთის სახელმწიფო ნავთობკომპანიას ეკუთვნის და ძირითადად ახლო აღმოსავლეთიდან მიღებულ ნავთობს ამუშავებს.
საუდის არაბეთიდან მიწოდების შეწყვეტის ფონზე, აშშ-მა ვენესუელიდან ნავთობის შესყიდვა მნიშვნელოვნად გაზარდა. თუ წლის დასაწყისში იმპორტი დღეში დაახლოებით 100 000 ბარელს შეადგენდა, ივლისში ეს მაჩვენებელი 600 000 ბარელამდე გაიზარდა.
წარსულში ყოფილა შემთხვევები, როდესაც საუდის არაბეთიდან ნავთობის მიწოდება რამდენიმე დღით შეჩერდა, თუმცა ივლისი პირველი სრული თვე იყო ასეთი იმპორტის გარეშე, თუმცა Kpler-ის პროგნოზით, აგვისტოში მიწოდება აღდგება და დღეში დაახლოებით 300 000 ბარელს მიაღწევს.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
