Mitsui Chemicals-მა შესაძლოა JSR $8.2 მილიარდად შეიძინოს

იაპონიის სახელმწიფო ფონდი Japan Investment Corp მის საკუთრებაში არსებული JSR-ის გაყიდვას განიხილავს. კომპანიის შეძენით Mitsui Chemicals არის დაინტერესებული. გარიგების ღირებულებამ შესაძლოა 8.2 მილიარდ დოლარს გადააჭარბოს.

JSR ჩიპების წარმოებისთვის საჭირო სპეციალურ მასალებს აწარმოებს. ისინი გამოიყენება ჩიპის სქემის სილიციუმის ფირფიტაზე გადასატანად. იაპონიის სახელმწიფო ფონდმა კომპანია ორი წლის წინ დაახლოებით 900 მილიარდ იენად შეიძინა.

Mitsui Chemicals ადასტურებს, რომ JSR-ის შეძენას განიხილავს, თუმცა საბოლოო გადაწყვეტილება ჯერ მიღებული არ არის. პასუხი სავარაუდოდ ნოემბრის ბოლომდე გახდება ცნობილი.

შესაძლო გარიგების ღირებულება თავად Mitsui Chemicals-ის საბაზრო ფასს აღემატება, კომპანიას კი მნიშვნელოვანი ვალიც აქვს. ინფორმაციის გავრცელების შემდეგ მისი აქციები 13%-ით გაიაფდა.

წყარო: Reuters