გეოპოლიტიკური დაძაბულობა ინვესტორებს სტრატეგიის შეცვლას აიძულებს

გეოპოლიტიკური დაძაბულობა და მაღალი ინფლაცია ინვესტორებს ახალ საინვესტიციო სტრატეგიებზე გადასვლას აიძულებს. Wall Street Journal-ის ანალიზის მიხედვით, კრიზისის დროს სახელმწიფო ობლიგაციები ინვესტორებს ზარალისგან ისე ვეღარ იცავს, როგორც ადრე.

ახლო აღმოსავლეთში მიმდინარე კონფლიქტები, აშშ-სა და ჩინეთს შორის დაძაბულობა, რუსეთის ომი უკრაინაში და ექსტრემალური ამინდი ფასების ზრდის რისკს მუდმივად ზრდის. წინა კრიზისებისგან განსხვავებით, ასეთ მოვლენებს უარყოფითი გავლენა ერთდროულად აქვს როგორც აქციებზე, ისე ობლიგაციებზე. ამის გამო პორტფელის სხვადასხვა აქტივში განაწილება ყოველთვის ვეღარ ამცირებს დანაკარგის რისკს.

ზოგიერთი ფონდი სხვა გზას ირჩევს. მაგალითად, ავსტრალიის 240-მილიარდიანი Future Fund-ი აქციებში ინვესტიციებს ზრდის. ფონდის შეფასებით, აქციებში უფრო მეტი თანხის დაბანდება გეოპოლიტიკური გაურკვევლობის პირობებში უკეთესი შედეგის მიღების შესაძლებლობას ზრდის.

ინვესტორები ოქროსა და ჰეჯ-ფონდებსაც მიმართავენ, თუმცა ბოლო პერიოდის კონფლიქტების დროს ოქრო ყოველთვის საიმედო არჩევანი არ აღმოჩნდა. ობლიგაციების შემთხვევაში კი ექსპერტები უფრო ხშირად ინფლაციაზე მიბმულ და მოკლევადიან ფასიან ქაღალდებს ანიჭებენ უპირატესობას.

უნდა აღინიშნოს, რომ ინვესტორები გეოპოლიტიკური საფრთხეების რეალურ გავლენას ხშირად მხოლოდ ვითარების გამწვავების შემდეგ აცნობიერებენ. მომავალში კი მათ ბაზარზე უფრო ხშირი რყევებისა და ობლიგაციებზე მაღალი განაკვეთებისთვის მზადება მოუწევთ.

წყარო: Investing.com