Lucid და Bolt ევროპაში 25,000 რობოტაქსის გამოშვებას გეგმავენ
ელექტრომობილების მწარმოებელი Lucid და ევროპული სატრანსპორტო პლატფორმა Bolt ევროპაში სულ მცირე 25,000 თვითმართვადი ავტომობილის გამოშვებაზე შეთანხმდნენ. პროექტით Lucid-ის რობოტაქსები პირველად გამოჩნდება აშშ-ის ფარგლებს გარეთ.
ავტომობილები Lucid-ის მომავალ Midsize პლატფორმაზე შეიქმნება და Nvidia-ს Hyperion ტექნოლოგიას გამოიყენებს. ისინი მეოთხე დონის ავტონომიური მართვისთვის იქნება გათვლილი. ასეთ მანქანას განსაზღვრულ ტერიტორიაზე მძღოლის ჩარევის გარეშე გადაადგილება შეუძლია.
Bolt თავად მართავს ავტოპარკს და პასუხისმგებელი იქნება დამუხტვის ინფრასტრუქტურისა და ქალაქებთან თანამშრომლობის ორგანიზებაზეც. კომპანიას 2035 წლისთვის საკუთარ პლატფორმაზე 100,000 ავტონომიური ავტომობილის განთავსება სურს.
Lucid-ს მსგავსი პროექტი აშშ-შიც აქვს. კომპანია Uber-სა და Nuro-სთან თანამშრომლობს და ამ შეთანხმების ფარგლებში სულ მცირე 35,000 ავტომობილის გამოშვებაა დაგეგმილი. ევროპული პროექტის ღირებულება და 25,000 ავტომობილის სრულად გამოშვების ვადა კომპანიებს ჯერ არ დაუსახელებიათ.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
