Mercedes: ჩინეთის ბაზარზე პოზიციების შენარჩუნება სულ უფრო რთულდება

Mercedes-Benz-ის ხელმძღვანელი ოლა კალენიუსი ამბობს, რომ ჩინეთის ავტომობილების ბაზარზე ფასების გამო დაპირისპირება კიდევ რამდენიმე წელი გაგრძელდება.

მისი თქმით, ჩინური კომპანიები დიდ თანხებს ხარჯავენ, რათა ძვირადღირებული ავტომობილების ბაზარზეც შევიდნენ და Mercedes-ის S-Class-სა და G-Class-ს კონკურენცია გაუწიონ.

ადგილობრივმა მწარმოებლებმა, მათ შორის BYD-მ, ჩინეთის ელექტრომობილების ბაზარზე წამყვანი ადგილი დაიკავეს. ისინი ხშირად უშვებენ ახალ მოდელებს და დაბალ ფასებს სთავაზობენ მომხმარებლებს. ამის გამო Mercedes-ის, BMW-ის, Porsche-ისა და Audi-ის გაყიდვები შემცირდა.

მდგომარეობას ჩინეთის უძრავი ქონების სექტორში არსებული კრიზისიც ართულებს. მომხმარებლები ძვირადღირებული მანქანების შეძენას ერიდებიან, თუმცა კალენიუსის თქმით, ყველაზე ძვირადღირებული ავტომობილების ბაზარზე Mercedes კვლავ ლიდერობს.

Mercedes-ის გაყიდვები ჩინეთში მეორე კვარტალში 30%-ით შემცირდა. კომპანია ხარჯების კიდევ უფრო შემცირებას გეგმავს, განსაკუთრებით გერმანიაში.

გაყიდვების გასაზრდელად Mercedes-მა ახალი GLA წარადგინა. მოდელს სრულად ელექტრო ვერსიაც ექნება, რომელიც ერთი დამუხტვით 657 კილომეტრამდე გაივლის. გერმანიაში მისი ფასი დაახლოებით 48 600 ევროდან დაიწყება.

წყარო: Investing.com