Porsche-ში შესაძლოა კვლავ 4,100 სამუშაო ადგილი შემცირდეს

Porsche-ში დაახლოებით 4,100 სამუშაო ადგილის შემცირება იგეგმება. ინფორმაცია Handelsblatt-მა Volkswagen-ის შიდა დოკუმენტებზე დაყრდნობით გაავრცელა. ახალი გეგმა კომპანიის ხარჯების შემცირებას და დაახლოებით €700-მილიონიანი დანაკლისის აღმოფხვრას უკავშირდება.

ახალი გეგმის დამტკიცების შემთხვევაში, Porsche-ში სამუშაო ადგილების შემცირება კიდევ უფრო მასშტაბური გახდება. კომპანიას უკვე გადაწყვეტილი აქვს დაახლოებით 9,000 პოზიციის გაუქმება. აქედან 4,000 ძველ გეგმას უკავშირდება, დამატებით 5,000-ის შემცირებაზე კი შეთანხმება ივლისში შედგა.

Porsche-ის მდგომარეობა ბოლო პერიოდში კიდევ უფრო გართულდა. ჩინეთში კომპანიის გაყიდვები შემცირდა, პრობლემებია ელექტრომობილების მიმართულებითაც. Volkswagen-მაც შეამცირა წლიური მოგების პროგნოზი და თვლის, რომ საოპერაციო მოგების მარჟა დაახლოებით 1% იქნება.

ახალი გეგმის დამტკიცების შემთხვევაში, 2035 წლისთვის Porsche-ის დაახლოებით ყოველი მეხუთე სამუშაო ადგილი გაუქმდება. კომპანიას გავრცელებულ ინფორმაციაზე კომენტარი არ გაუკეთებია.

წყარო: Yahoo Finance