როგორ გეგმავს მარკ კარნი აშშ-სთან სავაჭრო ომის დასრულებას

კანადის პრემიერ-მინისტრი მარკ კარნი მიიჩნევს, რომ ამერიკული ტარიფები ალუმინზე, რეალურად, თავად აშშ-ს ეკონომიკას აზარალებს. მისი განცხადებით, ამ სექტორში არსებული დავის მოგვარება შესაძლოა ორ ქვეყანას შორის გაცილებით მასშტაბური სავაჭრო შეთანხმების „გასაღები“ გახდეს.

კვებეკში, „რიო ტინტოს“ (Rio Tinto Group) ალუმინის ქარხანაში ვიზიტისას, კარნიმ ხაზგასმით აღნიშნა, რომ მას შემდეგ, რაც 2025 წლის ივნისში პრეზიდენტმა ტრამპმა იმპორტირებულ ლითონზე 50%-იანი საბაჟო გადასახადი დააწესა, აშშ-ში ალუმინის ფასები კატასტროფულად გაიზარდა. სტატისტიკა მეტყველებს, რომ მხოლოდ ერთ წელიწადში ალუმინის მწარმოებელთა ფასების ინდექსმა 52%-ით მოიმატა.

პრემიერ-მინისტრის თქმით, ფასების ზრდა მხოლოდ საერთაშორისო ბაზრის ტენდენციებით არ არის განპირობებული. „ფასნამატის უდიდესი ნაწილი სწორედ ტარიფის პირდაპირი შედეგია, რომლის გადახდაც ამერიკულ კომპანიებს უწევთ,“ - განაცხადა კარნიმ.

სიტუაციას ისიც ართულებს, რომ შეერთებული შტატები საკუთარი რესურსებით ვერ აკმაყოფილებს შიდა მოთხოვნას პირველად ალუმინზე და კრიტიკულად არის დამოკიდებული იმპორტზე. გასულ წელს ამერიკული იმპორტის თითქმის ნახევარი - 44% - სწორედ კანადაზე მოდიოდა.

ოტავას მიზანია, მიაღწიოს შეთანხმებას არა მხოლოდ ალუმინის, არამედ ფოლადის, ავტომწარმოებლობისა და ხე-ტყის სექტორებშიც. კარნიმ მკაფიოდ მიანიშნა, რომ კანადა არ აპირებს დასჯერდეს მხოლოდ ვიწრო, ერთჯერად გარიგებას, რომელიც სხვა სტრატეგიულ დარგებს მიღმა დატოვებს, თუმცა, ამერიკელი მაღალჩინოსნები კანადისგან საპასუხო ნაბიჯებს ელიან - საუბარია ავტომობილებზე დაწესებული საპასუხო ტარიფების გაუქმებაზე, რძის პროდუქტებით ვაჭრობის კონტროლის შემსუბუქებასა და პროვინციული სააგენტოების მიერ ამერიკული ალკოჰოლური სასმელების რეალიზაციაზე არსებული ბარიერების მოხსნაზე.

თუ მხარეები საერთო ენას ვერ გამონახავენ, სავაჭრო დაპირისპირება კიდევ უფრო გამწვავდება. ასეთ შემთხვევაში, ახალი ამერიკული სანქციები კანადური ექსპორტის ისეთ ნიშურ პროდუქტებსაც შეეხება, როგორიცაა რძე, ლუდი, ფანერა და ჰოკეის ეკიპირებაც კი.

წყარო: Investing.com