რუსული რუბლი დოლართან აპრილის შემდეგ ყველაზე დაბალ ნიშნულზეა

რუსული რუბლი ოთხშაბათს დოლართან 1.9%-ით გაუფასურდა და ერთი დოლარის ღირებულებამ 80 რუბლს გადააჭარბა. ასეთი მაჩვენებელი ბოლოს 3 აპრილს დაფიქსირდა.

20 მაისის შემდეგ რუბლი დოლართან ჯამში 14%-ით არის გაუფასურებული. ამავე დროს, ჩინურ იუანთან მისი კურსი 1%-ით შემცირდა და ერთი იუანის ფასი 11.8 რუბლამდე გაიზარდა.

ანალიტიკოსების შეფასებით, რუბლის გაუფასურება საგადასახადო პერიოდის დასრულებას უკავშირდება. გადასახადების გადახდისას რუსული კომპანიები უცხოურ ვალუტას ყიდიან და მიღებულ რუბლს იყენებენ, რაც ეროვნულ ვალუტაზე მოთხოვნას დროებით ზრდის. საგადასახადო პერიოდის დასრულების შემდეგ კი ეს ეფექტი ქრება.

ვალუტაზე გავლენას ნავთობის არასტაბილური ფასებიც ახდენს, რადგან ნავთობი რუსეთის მთავარი საექსპორტო პროდუქტია.

მაისიდან უკრაინამ რუსეთის ნავთობგადამამუშავებელ ქარხნებსა და სხვა ინფრასტრუქტურაზე თავდასხმები გააძლიერა. შედეგად, ქვეყანაში საწვავის დეფიციტი გაჩნდა და ინფლაციაც გაიზარდა.

წყარო: Investing.com